மீண்டு விட்டதா தமிழ் சினிமா? வெளிச்சத்துக்கு வரும் தகவல்கள்

தி.மு.க. ஆட்சியில் நடந்த சம்பவம் இது. மு.க. அழகிரியின் மகன் துரை.தயாநிதியின் நிறுவனம் ரிலீஸ் செய்த படம் தொடர்பாக அவரைப் பேட்டி காண விரும்பியது ஒரு சேனல். சத்யம் தியேட்டர் மாடியில் பில்லியர்ட்ஸ் ஆடிக் கொண்டிருந்த தயாநிதி அங்கே வரச் சொல்லிவிட்டார். தயாநிதி பேட்டி கொடுக்க இருப்பதைக் கேள்விப்பட்ட தியேட்டர் நிர்வாகம் மற்ற மேஜைகளில் ஆடிக்கொண்டிருந்தவர்களிடம் கெஞ்சி, இடத்தைக் காலி பண்ணுங்க" என்று கேட்டுக்கொண்டது. இந்தச் சம்பவத்தை நம்மிடம் சொன்ன ஒரு திரையுலகப் பிரமுகர், தியேட்டர்காரர்கள் கருணாநிதி குடும்ப உறுப்பினர்களுக்கு அந்த அளவு பயந்து கொண்டு ராஜமரியாதை கொடுத்தார்கள். பேட்டியின்போது எந்தத் தொந்தரவும் இருக்கக் கூடாதென்று மற்றவர்களைப் போகச் சொன்ன தியேட்டர் நிர்வாகம், அவர்களின் படங்களை மட்டுமே திரையிட்டு வந்ததில் ஆச்சர்யமென்ன?" என்று கேட்டார்.

சென்னை மட்டுமல்ல; தமிழகத்தின் மாவட்டத் தலைநகர்களில் உள்ள முக்கியமான தியேட்டர்களில் கூட தங்கள் படம் மட்டும்தான் திரையிடப்பட வேண்டும் என்று தியேட்டர் அதிபர்கள் ‘அன்பாக’ மிரட்டப்பட்டனர். இதனால் விஜய் நடித்த ‘காவலன்’ படமே கூட தியேட்டர் கிடைக்காமல் சில நாட்கள் பெட்டியில் அடங்கியது. ‘களவாணி’ போன்ற நல்ல படங்களுக்குப் பல தடைக் கற்கள். இது மக்களிடம் எரிச்சலை உண்டாக்கியது. சிறிய பட்ஜெட்டில் எடுக்கப்பட்ட நல்ல படங்களுக்கு தியேட்டரும் விநியோகஸ்தர்களும் கிடைக்கவில்லை. பல தயாரிப்பாளர்கள் நொந்து போனார்கள். தமிழ்ப் படவுலகில் அறிவிக்கப்படாத அவசர நிலை அமல்படுத்தப்பட்டு, ஒரு குடும்பம் கோலோச்ச அனுமதிக்கப்பட்டு விட்டது என்று புலம்பினார்கள்.

ஆட்சி மாறிய பின் நிலைமை மாறிவிட்டதா?

எங்களுக்கு இப்போது சுதந்திரம் கிடைத்திருக்கிறது. பேச்சு சுதந்திரம், கருத்துச் சுதந்திரம் போன்றவை எங்களிடமிருந்து பறிக்கப்பட்டு இருந்தன. இப்போது ஆரோக்கியமான சூழல் உருவாகி, நல்ல படங்களை ஒரு நம்பிக்கையுடன் தயாரிக்கும் நிலை உருவாகியிருக்கிறது," என்கிறார் தயாரிப்பாளர் கே.ஆர். முன்பு போல் திரையுலகில் கோலோச்ச முடியாது என்பதை உணர்ந்த துரை. தயாநிதி தமது ‘மங்காத்தா’ படத்தை சன் நிறுவனத்துக்கு கைமாற்றிவிட்டு லண்டனில் தற்காலிகமாக செட்டில் ஆகிவிட்டார். சன் நிறுவனமும், ‘நேரடியாகக் களத்தில் குதித்தால் வம்பு வந்து சேரும்’ என்று பயந்து ராதிகாவின் ரேடன் நிறுவனத்துக்கு 19 கோடிக்குக் கைமாற்றி(?) விட்டது.

ஆளும் கூட்டணியில் உள்ள சரத்குமார், ‘அரசு மற்றும் தியேட்டர்கள் தொடர்பாக ஏதாவது பிரச்னை வந்தால் சமாளித்துக் கொள்வார்’ என்று சன் நிறுவனமும் நினைத்ததில் தவறில்லை. சாட்டிலைட் உரிமையை மட்டும் வைத்திருக்கும் சன், தனது சேனல்களில் செய்த விளம்பர சுனாமி காரணமாக, ‘மங்காத்தா’ முதல் ஐந்து நாட்களிலேயே வசூலைக் கொட்டி அசர வைத்திருக்கிறது. உதயநிதி ஸ்டாலினும் தமது ‘ஏழாம் அறிவு’ படத்தை சன் மூலம் வெளியிட இருக்கிறாராம்.

சிலரது சேனல் பின்புலம்தான் எங்களைப் போன்ற தயாரிப்பாளர்களுக்குப் பெரிய சவால். ஊக்க மருந்து சாப்பிட்டு விட்டு ஓட்டப் பந்தயத்தில் கலந்து கொள்ளும் ஒருவருடன், உறுதியான, திறமையான வீரர் கலந்து கொண்டால் கூட அவர் தோற்றுத்தான் போய்விடுவார். படவுலகில் தொடர்ந்து இருக்கும் தயாரிப்பாளர்கள் மத்தியில் புயலெனப் புகுந்த சிலர், மீடியா என்ற ஊக்க மருந்தை கைவசம் வைத்துக் கொண்டு, தங்கள் தொடர்பான படங்களையே தமிழகம் முழுவதும் வெளியிட்டு விளம்பர பலத்தால் திரையுலகை, தங்கள் பிடிக்குள் வைத்துக் கொண்டார்கள்.

பத்திரிகைகளில் குறிப்பிட்ட அளவுக்கு மேல் சினிமா விளம்பரம் செய்யக்கூடாதென்று கட்டுப்பாடு உண்டு. அதேபோல் சேனல் நடத்துபவர்கள் தங்கள் படங்களுக்குக் கூட சகட்டுமேனிக்கு விளம்பரம் செய்து கொள்வதைத் தடுக்க, கட்டுப்பாடு தேவை. சேனலாகட்டும்; பத்திரிகைகளாகட்டும்; சமதள ஆடுகளம் இருக்கும்படியான நிலை உருவானால் மட்டுமே, நல்ல படங்களைத் தயாரிக்கும் சிறு தயாரிப்பாளர்கள் கூட தயாரிப்புத் தொழிலில் நீடிக்க முடியும்," என்கிறார் விநியோகஸ்தர்கள் சங்கத் தலைவர் கலைப்புலி சேகரன்.

‘மைனா,’ ‘மதராசபட்டினம்’ போன்ற பல நல்ல படங்கள் மக்களை ரீச் பண்ண அவர்கள்தானே காரணம்" என்கிறார் தி.மு.க. அனுதாபி ஒருவர்.

திரைப்பட விநியோகம் மற்றும் தியேட்டர் தொழிலில் முக்கியமான புள்ளி அபிராமி ராமநாதன். திரையுலகம் சிலரது பிடியிலிருந்து மீண்டு விட்டதா என்ற நம் கேள்விக்குப் பதிலளிக்க மிகவும் தயங்கினார் அவர். வேண்டாம் ஸார். சர்ச்சைக்கிடமான விவகாரம்" என்று கழன்று கொண்டார்.

தேர்தல் முடிந்து ஆட்சியும், காட்சியும் மாறியபின் முடங்கியிருந்த படங்கள் ரிலீஸாகத் தொடங்கி விட்டன. கடந்த நூறு நாட்களில் முப்பதுக்கும் மேற்பட்ட படங்கள் வெளிவந்திருக்கின்றன. ஆனால் நல்ல சரக்கு மட்டுமே விலை போகும் என்பது போல, ஒருசில படங்களே குறிப்பிடத்தக்க வெற்றியைப் பெற்றிருக்கின்றன. ‘அவன்-இவன்’, ‘தெய்வத் திருமகள்’, ‘காஞ்சனா’ ஆகிய படங்களை வெற்றிப் படங்களாகச் சொல்லலாம். ஆனால் முடிந்த படங்கள் வெளிவர ஒரு சாதகமான சூழல் நிலவுவதே தமிழ்த் திரைப்பட உலகம் சிலர் பிடியிலிருந்து மீண்டு விட்டது என்பதைக் காட்டுகிறது," என்கிறார் கலைப்புலி சேகரன். இருந்தும் இன்றைய திரைப்படத் தயாரிப்பு, விநியோகச் சூழல், ஆரோக்கியமாக இல்லை. காரணம், கொதிக்கும் எண்ணெய்ச் சட்டியிலிருந்து எரியும் தீக்குள் விழுந்து விட்ட நிலையில்தான் படவுலகம் இருக்கிறது. இதற்கு இரண்டு காரணங்கள். தியேட்டர்காரர்கள் தங்கள் இஷ்டத்துக்கு நிர்ணயித்துக் கொள்ளும் கட்டணம்; மற்றும் தொழிலாளர் சம்பளப் பிரச்னை. குறிப்பாக தொழிலாளர் சம்பளப் பிரச்னையில் படவுலகம் தடுமாறி நிற்கிறது. புதுப்பட பூஜைகள் நிறுத்தப்பட்டிருக்கின்றன.

தியேட்டர்களில் பிரபல நடிகர்கள் நடித்த படங்கள் ரிலீஸான முதல் வாரத்தில் டிக்கெட்டுக்கு 200, 250 என்று வசூல் வேட்டை ஆடுகிறார்கள் தியேட்டர் அதிபர்கள். தியேட்டரில் வசூல் ஆவதால் அரசுக்கு வரி மூலம் எந்த லாபமும் இருக்காது. காரணம், அரசு நிர்ணயித்துள்ள கட்டணப்படிதான் அவர்கள் வரி செலுத்துகிறார்கள். அரசை ஏமாற்றுகின்ற அதே சமயம் வசூல் விஷயத்தில் தயாரிப்பாளர் - விநியோகஸ்தர்களையும் தியேட்டர் அதிபர்கள் ஏமாற்றுகிறார்கள் என்பது பலரது குற்றச்சாட்டு. இப்போது சென்னையில் சில தியேட்டர்களில் வார வாடகை கொடுத்துவிட்டு படத்தைப் போடுகிறார்கள். பல படங்களுக்கு கொடுத்த வாடகையை விட மிகக் குறைவாக வசூலாகிறது. தயாரிப்பாளர் - விநியோகஸ்தர் தலையில் துணியைப் போட்டுக் கொண்டு போக வேண்டியதுதான். சென்னைக்கு வெளியே உள்ள தியேட்டர்களில் சதவிகிதக் கணக்கில் வியாபாரம் நடக்கிறது. ஏ.ஸி. தியேட்டர்களுக்கு, குறைந்தபட்சக் கட்டணம் ரூபாய் 20. அதிகபட்சம் 100. ஏ.ஸி. அல்லாத தியேட்டர்களுக்கு, பதினைந்திலிருந்து 70 ரூபாய் வரை நிர்ணயம் செய்ய வேண்டுமென்று அரசுக்கு வேண்டுகோள் வைத்துள்ளோம்," என்கிறார் தியேட்டர் உரிமையாளர் சங்கச் செயலர் திருச்சி ஸ்ரீதரன். இந்த விஷயத்தில் அரசு ஒரு முடிவு விரைந்து எடுக்க வேண்டும் என்பது பலரது எதிர்பார்ப்பு.

படவுலக விவகாரங்களில் தலையிடுவதை ஜெயலலிதா விரும்பவில்லை என்கிறார்கள். ‘மங்காத்தா’ படம் மூலம் சன் நிறுவனம் மீண்டும் களத்துக்கு வந்தாலும் அதிகாரப் பின்னணி இல்லாததால் இனி அடாவடி, அத்துமீறல் இருக்காது என்றும் கருதப்படுகிறது.

அரசிடமிருந்து எந்தக் குறுக்கீடும் கிடையாது. எங்கள் பிரச்னைகளை நாங்களே தீர்த்துக் கொள்ளும் சூழல்தான் இருக்கிறது," என்கிறார் கலைப்புலி சேகரன்.

- ப்ரியன்

பாக்கி இல்லை

சன் நிறுவனம் உதயநிதி ஸ்டாலின், துரை தயாநிதி ஆகியோர் தயாரித்த படங்களில் தொழிலாளர்களுக்கு எந்தப் பாதிப்பும் கிடையாது," என்கிறார் திரைத் தொழிலாளர் கூட்டமைப்பின் முன்னாள் தலைவரான வி.சி.குகநாதன். பையனூரில் திரைப்படக் கலைஞர்கள் தொழிலாளர்களுக்காகக் கட்டப்படும் குடியிருப்பைப் பற்றி விசாரித்தோம்.

50 ஏக்கரில் 10,000 வீடுகள் கட்ட வேண்டுமென்பது திட்டம். ஹட்கோ நிறுவனம் 249 கோடி நிதி உதவி செய்கிறது. இந்தக் கடனுக்கு தமிழக அரசு கியாரண்டி. 15 ஏக்கரில் இரண்டு படப்பிடிப்புத் தளங்களை எங்கள் செலவில் அமைக்கிறோம். இந்தப் பணிகளை வேகப்படுத்த அரசுடன் தொடர்பில் இருக்கிறோம்" என்றார் அவர்.

இந்த செய்தியை நீங்களும் மற்றவர்களுக்கு பரப்பலாமே?

அவ்வளவு சினிமா பிஸியிலும் ஒரு மெசேஜ் வந்திருக்கிறது சூர்யாவிடமிருந்து. என் படம் ரிலீஸ் ஆவுது. கண்டிப்பா பாருங்க என்று அதில் செய்தி வந்திருந்தால், இந்த செய்திக்கு இடம் இல்லை. ஆனால் வந்தது அது அல்ல. வேறு…

ஹாய் நான் சூர்யா. இந்த குறுந்தகவலை படிச்சுட்டு உங்க நண்பர்களுக்கும் ஃபார்வேடு பண்ணுங்க என்று அறிமுகமாகிறார்.

அதன்பின் எழுதப்பட்டிருப்பதுதான் இந்த பிட் செய்தியிலிருக்கும் பிரதான விஷயம். வசதியின்மை காரணமாக தங்கள் படிப்பை பாதியிலேயே நிறுத்திவிடுகிற சூழ்நிலைக்கு தள்ளப்படுகிற மாணவர்கள் யாராக இருந்தாலும் தயங்காமல் என்னை தொடர்பு கொள்ளவும். உங்கள் கல்வி தொடர நான் உதவி செய்ய தயாராக இருக்கிறேன்.

இவ்வாறு எழுதப்பட்டுள்ள அந்த தகவலில் சூர்யாவினால் நடத்தப்படும் அகரம் பவுண்டேஷன் நிர்வாகியின் தொலைபேசி எண் தரப்பட்டுள்ளது. அது 9841091000.

இந்த செய்தியை நீங்களும் மற்றவர்களுக்கு பரப்பலாமே?

A Major tragedy caused by a Railway Driver's error in Chnnai

VELLORE (Tamil Nadu):
Preliminary investigations by the Railways into Tuesday night's train collision near Arakkonam point to an error on the part of the driver of the Chennai Beach-Vellore Cantonment Mainline Electrical Multiple Unit. Driver Rajkumar did not stop at the red signal ahead of the Chitheri station but jumped off the train before it rammed the stationary Arakkonam-Katpadi EMU Passenger. He suffered serious injuries and is undergoing treatment in the Government General Hospital, Chennai. Railway Minister Dinesh Trivedi, who on Wednesday visited the site of the accident, in which 10 passengers were killed and 66 persons suffered serious injuries, said the driver ought to have stopped at the signal. But as he was now in a traumatised condition, “we cannot question him too much.” It was still too early to fix the blame on anyone, the Minister said. The dead included the guard of the Arakkonam-Katpadi Passenger. Most of the dead and the injured were small-time traders and workers belonging to villages in the vicinity of Arakkonam. Of the 76 cases referred to the Arakkonam General Hospital, 10, including a woman, were brought dead. While 24 persons were treated there, 22 who suffered multiple fractures and facial injuries and three others, who sustained head injuries, were referred to the General Hospital in Chennai. For, there was no orthopaedic surgeon in the Arakkonam hospital. Seventeen persons, including six women, were referred to other hospitals at their own request. Ilango of Banavaram village, undergoing treatment in the Arakkonam hospital, said he heard a huge sound and immediately smoke enveloped his coach in the Katpadi-bound train. “Several passengers fell on me, and I had to make my way out of the compartment.” Locals rushed to the accident spot and rescued the passengers trapped in the derailed coaches. Two bogies of the stationary train and three bogies of the moving train jumped the rails. ‘No system failure' Mr. Trivedi told journalists: “Something somewhere had gone wrong” but there was no “system failure.” On the proposal to install anti-collision devices, he said the Railways would take all safety measures to prevent such accidents. The families of the dead would be given Rs. 5 lakh each and the seriously injured Rs. 1 lakh each. Those who sustained simple injuries would be given Rs. 25,000 each. Mr. Trivedi was accompanied by Union Minister of State for Railways K.H. Muniyappa, Railway Board Chairman Vinay Mittal and Southern Railway General Manager Deepak Krishan. New Delhi Special Correspondent writes: Railway spokesperson Anil Kumar Saxena said in New Delhi that the Ministry had ordered an inquiry and it would be conducted by the Commissioner of Railway Safety, Southern Zone, S.K. Mittal. He would be asked to submit a report at the earliest, Mr. Saxena said.

அழகிரி தொடக்கி வைத்தார். அதில், இளவரசர் சிக்கிக் கொண்டார்!

மு.க.அழகிரி தேவையில்லாத விஷயத்தில் வாயைத் திறந்து சிக்கலில் மாட்டிக் கொண்டிருக்கிறார் என்று, தி.மு.க. வட்டாரங்களிலேயே பேசத் தொடங்கியுள்ளார்கள். மதுரைக்கு அருகே கிரானைட் தொழில் செய்தது பற்றிய சட்டப் பேரவைப் பேச்சும், அதற்கு அழகிரி எகிறிய எகிறலையும் பற்றியதுதான் இந்த விவகாரம்.

சட்டப்பேரவையில் அமைச்சர் வேலுமணி, “கடந்த ஆட்சியில், மதுரை மற்றும் அதன் சுற்றுப்புற கிராமங்களை வளைத்து, அப்போதைய முதல்வரின் மகன் அழகிரியும் அவரது கூட்டாளிகளும் கிரானைட் குவாரிகள் நடத்தி கொள்ளையடித்தனர். தற்போது, அந்த குவாரிகள் மூடப்பட்டு விட்டன. அவற்றுக்கான லைசென்ஸ்கள் ரத்து செய்யப்பட்டுள்ளன” என்று பேசியிருந்தார்.

அமைச்சரின் இந்தப் பேச்சு பத்திரிகைகளில் வெளியான அன்று மாலையே, பத்திரிகையாளர்களை அழைத்த அழகிரி, இது என்மீது சுமத்தப்பட்ட அவதூறு. அமைச்சரிடம் இதற்கு ஆதாரம் இருக்கிறதா? அவரால் ஆதாரம் காட்ட முடியாவிட்டால், நான் மானநஷ்ட வழக்கு போடுவேன். அமைச்சரை கோர்ட்டுக்கு இழுப்பேன்” என்றெல்லாம் எகிறியிருந்தார்.

அழகிரி இப்படி அதிரடியாக சவால் விட்ட உடனேயே, தி.மு.க. விட்டாரங்களில் தணிந்த குரலில், “இவருக்கு ஏன் தேவையில்லாத வேலை? மடியில் கனத்தை வைத்துக்கொண்டு இப்படி வார்த்தைகளை விடலாமா?” என்று கிசுகிசுக்கத் தொடங்கியிருந்தனர். அதை விசாரிக்கப் போனால், “பிசினெஸ் அழகிரியுடையது அல்ல என்பது உண்மைதான். ஆனால், அழகிரி மகன் துரை தயாநிதி தனி ட்ராக்கில் ஓடிய வியாபாரமல்லவா இது?” என்றார்கள்.

சட்டப் பேரவையில் “மதுரை மற்றும் அதன் சுற்றுப்புறங்களில்” என்று மொட்டையாகக் கூறப்பட்டிருந்தாலும், இந்த பிசினெஸ்ஸின் எக்ஸாக்ட் ஸ்பாட், மதுரைக்கு வெளியே மேலூருக்கு அருகே உள்ளது.

கற்கள் வெட்டியெடுக்கப்பட்ட மலையின் பெயர், சக்கரைபீர் மலை. திருப்பத்தூர் ரோட்டில் சென்றால் வரும் கீழவளவு என்ற இடத்தில் உள்ளது இந்த மலை. கடந்த தி.மு.க. ஆட்சிக் காலத்தில் ஹெவி எக்யூப்மென்ட்ஸ் மூலம், சக்கரைபீர் மலையின் நடுவே, அதைப் பாதியாக வெட்டி கற்கள் அகற்றப்படுவதை தொலைவில் இருந்தே காணக்கூடியதாக இருந்தது.

இதெல்லாம் ஒன்றும் ரகசியமாக நடைபெறவில்லை. அப்பகுதி மக்களைக் கேட்டால் அலட்சியமாக, “அழகிரி மகன் மலையை லீசுக்கு எடுத்து வெட்டினாரு” என்கிறார்கள்.

ஆதாரங்களைக் காட்டாவிட்டால் நீதிமன்றம் போவேன் என்று அழகிரி சவால் விடப்போக, தொழில்துறை அமைச்சர் வேலுமணி சக்கரைபீர் மலைக்கே நேரில் போய் இறங்கிவிட்டார். அவருடன், கூட்டுறவுத்துறை அமைச்சர் செல்லூர் ராஜூ, மாவட்ட கலெக்டர் சகாயம் ஆகியோரும் ஆஜர்.

அழகிரியின் மகன் துரை தயாநிதி, மற்றொரு தி.மு.க. பிரமுகர் சூடம்மணியின் மகன் நாகராஜ் என்பவருடன் சேர்ந்து நடத்திய வியாபாரம் அது. இவர்கள் இருவரும் நடத்திய நிறுவனத்தின் பெயர், ஒலிம்பஸ் கிரானைட். இவர்களது கிரானைட் தொழிற்சாலை அமைந்துள்ள நிலத்திலும், உரிமையாளர் விஷயத்தில் வில்லங்கம் இருப்பதாகத் தெரிகிறது.

ஆட்சி மாறியதும் அவசர அவசரமாக, ஒலிம்பஸ் கிரானைட் நிறுவனத்தின் உரிமையாளராக துரை தயாநிதி இல்லை என்று காட்டுவதற்கு சில டாக்குமென்ட்ஸ் தயாரித்திருக்கிறார்கள். எல்லாமே பேக்-டேட் பண்ணி, தயாரிக்கப்பட்ட இந்த ஆவணங்களை நம்பினால், 2010ம் ஆண்டில் இருந்தே துரை தயாநிதிக்கு அந்த நிறுவனத்துடன் தொடர்பு இருக்கக்கூடாது.

ஆனால், ஆவணங்கள் தயாரிக்கப்பட்ட முறை, தில்லுமுல்லைக் காட்டிக் கொடுக்கின்றது என்கிறார்கள்.

அதே நேரத்தில் இதற்கான உரிமம் வாங்கப்பட்ட போது செய்யப்பட்ட விண்ணப்பம், மற்றும் ஆரம்ப கால ரிஜிஸ்ட்ரேஷன் ஆகியவற்றில் துரை தயாநிதியின் பெயர் இருப்பதை யாரும் மாற்றிவிட முடியாது. காரணம், அவை ஏற்கனவே பதிவாகிவிட்ட தகவல்கள்.

அதேபோல, இவர்கள் ஏற்றுமதி செய்த குவான்டிட்டி, அதற்கான இன்வாயிஸ், வால்யூவேஷன் சர்ட்டிபிகேட் ஆகியவையே போதும், இங்கு வெட்டி எடுக்கப்பட்ட கற்களின் அளவை உறுதிப்படுத்த என்கிறார்கள் விஷயம் அறிந்தவர்கள். கிரானைட் குவாரி ஆரம்பிக்கப்பட்ட நாளில் இருந்தே, வெட்டப்பட்ட கற்களின் அளவு, உரிமம் கொடுக்கப்பட்ட அளவைவிட, பல மடங்கு அதிகம் என்பதை மிகச் சுலபமாக நிரூபிக்கலாம் என்றும் கூறுகிறார்கள்.

அண்ணன் அஞ்சா நெஞ்சர்தான், ஆழம் தெரியாமல் வாயைத் திறந்து விட்டாரோ!

-மதுரையிலிருந்து இரா.பிரபாகரின் குறிப்புகளுடன், ரிஷி.

இதுதாம்பா ‘அசத்தலான’ வியாபார தந்திரம்!

உராசூ, பிரேசில்:
கடந்த வருடம் சில சீன நிறுவனங்கள் வர்த்தக விசாரணைகளுடன் பிரேசிலுக்கு வந்தபோது, சீனர்கள் பிரேசிலில் என்ன செய்யப் பார்க்கிறார்கள் என்பது யாருக்கும் புரிந்திருக்கவில்லை. இப்போதுதான் சீனத்திட்டம் புரிந்திருக்கிறது பிரேசில் நாட்டில்.
வந்திறங்கிய சீன அதிகாரிகள் பிரேசிலின் சிறிய நகரங்களைக் குறிவைத்து அங்கே சென்றார்கள். அவர்களது விசாரணைகள் சோயா பீன்ஸ் வாங்குவது பற்றியே இருந்திருக்கின்றது. வியாபார விசாரணைகளில் அவர்களது அணுகுமுறை, அதுவரை பிரேசிலியர்கள் கண்டிராத ஒன்றாக இருந்தது.

சோயா பீன்ஸ் மொத்த விற்பனை விலையைத்தான் முதலில் கேட்டார்கள் சீனர்கள். அது விளையும் பண்ணை நிலங்களைப் பார்க்க வேண்டும் என்று அடுத்த கேள்வியைக் கேட்டார்கள். மூன்றாவது கேள்விதான் பிரேசில் விவசாயிகளை தலை கிறுகிறுக்க வைத்தது.

“இவற்றை மொத்தமாக விலைக்குத் தருவீர்களா?” என்பதே அந்தக் கேள்வி.

இதில் என்ன ஆச்சரியம்? பொருள் பிடித்து விலையும் சரியாக அமைந்தால் மொத்தமாக வாங்குவது சகஜம்தானே? கதை அதுவல்ல. அவர்கள் மொத்தமாக விலைக்குக் கேட்டது சோயா பீன்ஸ்களை அல்ல. அவை விளையும் பண்ணை நிலங்களை!

அந்த நிலங்களின் மார்க்கெட் விலையைவிட இரண்டு மடங்கு விலை கொடுக்க தயாராக இருந்தன சீன நிறுவனங்கள். ஆனால், பிரேசிலின் பண்ணை விவசாயிகள் விழித்துக் கொண்டனர். சீனர்கள் மொத்தமாக விலைபேசிய கிட்டத்தட்ட 60,000 ஏக்கர் பண்ணை நிலங்களை அவர்கள் விற்கத் தயாராக இல்லை.

சீன நிறுவனங்களுக்கு ஏமாற்றம்தான். ஆனால், அதை வெளிக்காட்டிக் கொள்ளாமல், அந்த விவசாயிகளிடமிருந்தே சோயா பீன்ஸ்களை நல்ல விலை கொடுத்து வாங்கினார்கள். சீனாவுக்கு கப்பலில் ஏற்றுமதி செய்தார்கள்.

உராசூ சிறு நகரின் பண்ணைகளுக்கு நடுவே, சோயா பீன்ஸ் எடுத்துச் செல்ல புதிய ரயில்வே பாதை!

அடுத்த போக வேளாண்மை எப்போது என்று கேட்டுவிட்டுச் சென்றார்கள். பிரேசிலைவிட்டு சீனாவுக்குத் திரும்பியபோது, தமது அலுவலகம் ஒன்றையும் அங்கே அமைத்துவிட்டு, அதற்கு ஒரு பிரதிநிதியையும் நியமித்துவிட்டுச் சென்றார்கள்.

இந்த சீனப் பிரதிநிதி, பிரேசிலின் சிறு நகரங்களிலுள்ள பெரிய, சிறிய பண்ணை விவசாயிகளுடன் தொடர்பில் இருந்தார். அதிகளவில் சோயா பீன்ஸ் பயிரிடுமாறும், சீன நிறுவனங்கள் வாங்கிக் கொள்ளும் என்றும் உறுதியளித்தார்.

இந்த இடத்தில் ஒரு சிக்கல்.

அதிக உற்பத்திக்கு பிரேசில் விவசாயிகளிடம் போதிய முதலீடு இருக்கவில்லை. “அப்படியா விஷயம்? நோ ப்ராப்ளம்” என்றார் சீனப் பிரதிநிதி.

பண்ணை விவசாயிகளுடன் ஒப்பந்தம் செய்துகொண்டு அவர்களுக்கு கடன் கொடுத்தன சீன நிறுவனங்கள். ஒப்பந்தத்தின்படி, பண்ணைகளில் விளையும் சோயா பீன்ஸில் 80% கடன் கொடுத்த சீன நிறுவனங்களுக்கு விற்கப்பட வேண்டும்.

இந்த ஒப்பந்தத்தின் பெறுமதி, 7 பில்லியன் அமெரிக்க டாலர்!

பிரேசிலின் சிறு நகரங்களில் ஒன்றான உராசூவில் வசிக்கும் பண்ணை விவசாயி எடிமில்சன் சன்டானா, “இந்த சீனர்களுக்கு இவ்வளவு சோயா பீன்ஸ் எதற்கு என்றே புரியவில்லை. நிலைமையைப் பார்த்தால், உலகிலேயே சோயா பீன்ஸை அதிகளவில் நேசிப்பவர்கள் சீனர்கள்தான் போலிருக்கிறது” என்கிறார் வியப்புடன்.

எடிமில்சன் சன்டானாவுக்கு தெரியாத ஒரு விஷயத்தை உங்களுக்குச் சொல்கிறோம். சீனாவுக்கு எதற்காக சோயா பீன்ஸ் ஏற்றுமதியாகிறது தெரியுமா? சீனாவின் பெரிய பண்ணைகளில் உள்ள ஆடு. மாடு, கோழி ஆகிய கால்நடைகளுக்கு உணவாகக் கொடுக்க!

இருந்து பாருங்கள், அந்த கோழி இறைச்சி பேக் பண்ணப்பட்டு பிரேசிலின் மார்க்கெட்டுக்குள் வந்துவிடும், Product of China என்ற எழுத்துக்களுடன்!

-இக்ஸ்டாபா, மெக்சிகோவிலிருந்து பிரான்சிஸ்கோ தலமான்டேவின் குறிப்புகளுடன், ரிஷி.

புதிய விக்கிலீக்ஸ் ‘ஸ்ரீலங்கா’ கேபிள், தமிழகத்தில் வில்லங்கம்!

புதுடில்லி, இந்தியா: தற்போது வெளியாகியுள்ள புதிய விக்கிலீக்ஸ் கேபிள் ஒன்று, தமிழகத்தில் காங்கிரஸ் கட்சிக்கு சங்கடமான நிலையை ஏற்படுத்தப் போகின்றது. ஸ்ரீலங்கா விவகாரம் தொடர்பான இந்த கேபிள், மத்திய அரசின் ஸ்ரீலங்கா பற்றிய ரகசிய அணுகுமுறையை வெளிப்படுத்துகிறது.

“மேலை நாடுகள் ஸ்ரீலங்கா பற்றி தெரிவிக்கும் எதிரான கருத்துக்கள், கொழும்புவை சீனாவின் பக்கமாகவே மேலும் தள்ளிச் செல்கின்றன என்று இந்தியா கவலை கொள்கிறது” இவ்வாறு இந்திய வெளியுறவு அமைச்சக அதிகாரி ஒருவர் அமெரிக்க ராஜதந்திரியிடம் ஒப்புக் கொண்டதாகக் குறிப்பிடுகிறது இந்த கேபிள்.

இதன் அர்த்தம்-

ஸ்ரீலங்கா மீது மேலை நாடுகள் குற்றம் சுமத்துவதை, இந்திய அரசு விரும்பவில்லை.

கடந்த (2010) ஆண்டு ஜனவரியில், புதுடில்லியின் கூட்டுச் செயல்திட்ட இணை செயலர் டி.எஸ்.திருமூர்த்தி, “ஸ்ரீலங்காவில் தமிழர்கள் அதிகளவில் வசிக்கும் வடபகுதியில் (யாழ்ப்பாணம் மற்றும் வன்னி) .சீனா மேற்கொள்ளும் அபிவிருத்தித் திட்டங்கள் இந்திய திட்டங்களுக்கு எதிரானவை. அங்கு சீனாவை அனுமதிப்பது இந்தியாவின் பாதுகாப்பு மற்றும் சமூக அக்கறை ஆகியவற்றை பாதிக்கின்றன” என்று புதுடில்லியின் நிலைப்பாட்டை அமெரிக்க ராஜதந்திரி ஒருவரிடம் வெளிப்படுத்தியதாக கூறுகின்றது விக்கிலீக்ஸ் கேபிள்.

இதே கேபிளில், புதுடில்லியிலுள்ள ஸ்ரீலங்கா தூதரகத்தில் பணியாற்றும் முதல் செயலர் ஒருவர் அமெரிக்க ராஜதந்திரி ஒருவருக்கு அடித்த காமென்ட் பற்றியும் குறிப்பிடப்பட்டுள்ளது.

“ஸ்ரீலங்காவின் வட பகுதியில் நடைபெறும் ரயில் பாதை அமைக்கும் வேலைத் திட்டத்தின் ஒரு பகுதியை சீனா கவனிக்கின்றது. மற்றைய பகுதி இந்தியாவால் செய்யப்படுகின்றது. சீனாவின் பகுதியில் வேகமாக வேலை நடைபெற்று முடியும்போது, இந்தியப் பகுதியில் வேலைகள் பூர்த்தி அடையாமல் இருப்பது, புதுடில்லிக்குத்தான் அவமானமான விஷயம்.

நிலைமை இப்படியிருக்கையில், ஸ்ரீலங்காவின் வடபகுதியில் சீனா செய்யும் வேலைத்திட்டங்கள் பற்றி இந்தியா கவலை கொள்வதும், அங்கு சீனாவுக்கு பதிலடி கொடுக்க முனைவதும் நகைப்புக்கிடமான விஷயம்” என்பதுதான், ஸ்ரீலங்கா தூதரக அதிகாரியின் கிண்டல் காமன்ட்!

அதேநேரத்தில், “சீனாவின் நடவடிக்கைகளுக்கு பதிலடி கொடுக்க இந்தியா தயங்கவில்லை” என்று அமெரிக்க ராஜதந்திரியிடம் தெரிவித்துள்ள திருமூர்த்தி, 2009ம் ஆண்டு டிசெம்பரில் இந்தியாவால் ஸ்ரீலங்காவுக்கு வழங்கப்பட்ட 425 மில்லியன் டாலர் லைன் ஆஃப் கிரெடிட் பற்றியும் குறிப்பிட்டிருக்கிறார்.

இந்த லைன் ஆஃப் கிரெடிட் யாருடைய கவனத்தையும் கவராமல், கொடுக்கப்பட்டிருந்தது.

புதுடில்லி கொழும்புவுக்கு கொய்யாப்பழம் கொடுத்தாலே கொந்தளிக்கும் தமிழக அவசியல்வாதிகள் யாருமே, 425 மில்லியன் டாலர் லைன் ஆஃப் கிரெடிட் பற்றி வாயே திறக்கவில்லை! பாவம், அவர்களுக்கு அதுபற்றி தெரியாமலேகூட இருக்கலாம்!

பரமக்குடியில், திட்டமிட்டு ‘கலவரத்தை’ தொடக்கிய பின்னணி இதோ!

பரமக்குடியில் திடீரென ஏற்பட்ட கலவரம்” என்று கூறினாலும், கலவரம், ‘திடீரென’ ஏற்படவில்லை. ஏற்கனவே திட்டமிடப்பட்டு தொடங்கப்பட்ட கலவரம்தான் என்று தெரிகிறது. ஆனால், ஸ்பாட்டில் நின்றவர்களும் உணர்ச்சிவசப்பட்டு குதித்து விட்டதில், திட்டமிட்டவர்கள் எதிர்பார்த்ததை விட பெரிதாக முடிந்திருக்கிறது.

பரமக்குடி, இந்தியா: தென் மாவட்டங்களின் சில பகுதிகளில், வன்முறை அடித்தளம் கொண்ட சில ஜாதிக் கட்சிகளின் செல்வாக்கு சமீபத்தில் சரிந்து வருவதை தடுத்து தூக்கி நிறுத்தும் முயற்சிதான், இந்தக் கலவரத்தின் பேஸ் என்கிறார்கள். அதை எப்படிச் செய்யலாம் என்று யோசித்துக் கொண்டிருக்கையில், இமானுவேல் சேகரன் நினைவு தினம் வசதியாக வந்து அமைந்திருக்கிறது.

அன்றைய தினத்தை உபயோகித்துக் கொண்டுள்ளார்கள்.

தமிழக உளவுத்துறை, ராமநாதபுரம் மாவட்டத்தில் வன்முறை வெடிப்பதற்கு சாத்தியம் இருப்பதாக ஏற்கனவே சென்னைக்கு அறிக்கை கொடுத்திருந்ததாக தெரிகிறது. அத்துடன், நினைவுநாள் நெருக்கத்தில் பள்ளிக்கூட மாணவர் ஒருவர் சனிக்கிழமை கொலை செய்யப்பட, காவல்துறை அலர்ட் ஆகியது. மாவட்டத்தில் 144 தடை உத்தரவு பிறப்பிக்கப்பட்டது. கூடவே, முன்னெச்சரிக்கை நடவடிக்கைகள் சிலவும் எடுக்கப்பட்டன.

அப்படி எடுக்கப்பட்ட நடவடிக்கைகளில் ஒன்று, வெளி மாவட்டங்களில் இருந்து முக்கிய பிரமுகர்கள், ஜாதிக்கட்சி தலைவர்கள் யாரும் இமானுவேல் சேகரன் நினைவு தினம் முடியும்வரை பரமக்குடிக்கு வர காவல்துறை விதித்த தடை.

தடை இருப்பது தெரிந்தும், தூத்துக்குடியில் இருந்து பரமக்குடிக்கு வர முயன்ற தமிழக மக்கள் முன்னேற்றக் கழகத் தலைவர் ஜான் பாண்டியன், காவல்துறையால் வல்லநாடு அருகே தடுத்து நிறுத்தப்பட்டார். போலிஸ் தடுத்தும் கேளாமல் பரமக்குடிக்குச் செல்வேன் என்று அவர் பிடிவாதம் காட்டியதில், கைது செய்யப்பட்டார்.

ஜான் பாண்டியன் வருகிறார் என்று பரமக்குடியில் விளம்பரப்படுத்தப் பட்டிருந்தது. இதனால் காலை 10 மணியிலிருந்தே அவரது வருகையை எதிர்பார்த்து, பரமக்குடியில் பலர் காத்திருந்தனர். மதியம் 12 மணியளவில் அவர் கைது செய்யப்பட்ட தகவல் கிடைத்தது.

கைது செய்யப்பட்ட தகவல், காத்திருந்த கூட்டத்துக்கு சூடேற்றும் விதத்தில் உணர்ச்சிகரமாக கூறப்பட்டது. அதன் பின்னணியில் துல்லியமான திட்மிடலும், முன்னேற்பாடுகளும் தெரிந்தன. கைது செய்யப்பட்ட சேதி வந்தவுடன் எப்படிச் செயற்பட வேண்டும் என்று முன்கூட்டியே ஒத்திகை பார்த்துவிட்டு வந்ததுபோல இருந்தன இதை ஆர்கனைஸ் பண்ணியவர்களின் நடவடிக்கைகள்.

ஜான் பாண்டியனுக்காக காத்திருந்தவர்கள் மற்றும் ஆதரவாளர்களைத் திரட்டி, பரமக்குடி ஐந்துமுனை ரோட்டில் திரட்டியவர்கள், ரோட்டை மறித்து மறியல் செய்யத் தொடங்கினார்கள். மறியல் செய்யும் ஆட்களிடையே, வன்முறைக்கு தயாராக வந்திருந்த ஆட்கள் சுலபமாக கலந்து கொண்டார்கள். சாலை மறியல் செய்தவர்களின் கோஷங்களில், “காவல்துறையை வெட்டுவோம், ஓடஓட விரட்டுவோம்“ என்ற கோஷங்களும் லைட்டாக புகுத்தப்பட்டன.

ஒரு கட்டத்தில் அங்கிருந்த மொத்தக் கூட்டமும் உணர்ச்சி வசப்பட்ட நிலைக்கு கொண்டுவரப்பட்டது. இதற்குள் ஐந்துமுனை ரோடு கடந்து, குறிப்பிட்ட சமூகத்தினரால் நன்கு அறியப்பட்ட பெட்டிக்கடை உள்ள சந்தில் மதுபான விநியோகமும் நடந்தது. காவல்துறையினர் மிக சொற்ப அளவிலேயே காணப்பட்டனர். யாரும் யாரையும் தடுக்கவில்லை.

கோஷங்கள் வலுக்கத் தொடங்கி, கூட்டம் ஓரளவுக்கு கட்டுக்கடங்காத நிலைக்குப் போகத் தொடங்கவே, அண்ணா நகர் துணை கமிஷனர் செந்தில்வேலன் ஸ்பாட்டுக்கு வந்திறங்கினார். சாலை மறியலைக் கைவிடுமாறு கூறி, பேச்சுவார்த்தை நடத்தத் தொடங்கினார்.

அவரது சமாதானப் பேச்சுக்கள் இந்தக் கூட்டத்தில் எடுபடவில்லை. ஆளாளுக்கு கூச்சல் போடத் தொடங்கினார்கள். கூட்டத்துக்குள் ஊடுருவியிருந்த ஆட்கள்வேறு உசுப்பேற்றிக் கொண்டிருந்தார்கள். கொஞ்சம் கொஞ்சமாக கூட்டம் காவல்துறையினரைச் சுற்றி வளைக்கத் தொடங்கியது. அதில் இருந்த ஒருவர், செந்தில்வேலனின் சட்டையைப் பிடித்து இழுத்தார். பதிலுக்கு, செந்தில்வேலன் கையை ஓங்கினார்.

இதற்காக காத்திருந்ததுபோல காரியங்கள் நடக்கத் தொடங்கின. சுவிட்ச் போட்டதுபோல, சடசடவென்று போலீசார் மீது கற்கள் வந்து விழத் தொடங்கின. கல்வீச்சின் தொடக்கம், இயல்பாக நடைபெறும் கோபத்தின் வெளிப்பாடாக தெரியவில்லை. ஆனால், அந்தத் தொடக்கம் நன்றாகப் பற்ற வைத்தது. உணர்ச்சிவசப்பட்ட கூட்டம், மிகுதியைக் கவனித்துக் கொண்டது. தூண்டிவிடப்பட்ட கோபம், கலவரமாக மாறியது.

அதுவரை ஐந்துமுனை ரோட்டில் கும்பலாக நின்றிருந்த ஆட்கள் எல்லாத் திசையிலும் ஓடுவதும், திரும்பி வருவதுமாக இருந்தனர். வேடிக்கை பார்க்க நின்ற கூட்டமும் சிதறி ஓடியது. கூட்டத்தில் சிக்கிய பரமக்குடி டி.எஸ்.பி. கணேசனை குறிவைத்த சிலர், நேருக்கு நேராகவே அவரைப் பிடித்து கீழே தள்ளிவிட்டனர்.

தரையில் விழுந்த அவர் உடனடியாக எழ முடியாத நிலையில் இருக்க, அவரது தலையின் மீது, பெரிய கல் ஒன்றைப் போட்டு விட்டு, அருகில் நின்றிருந்த போலிஸாரின் கைகளில் சிக்காமல் தப்பி ஓடினர் சிலர். தலையில் காயமடைந்த டி.எஸ்.பி. கணேசனை, அங்கிருந்து சிரமப்பட்டு வெளியே கொண்டுவந்து பரமக்குடி மருத்துவமனையில் சேர்த்தனர் மற்றைய போலிஸார்.

இதற்குள் சம்பவம் நடந்த இடத்தில் கல்வீச்சு உக்கிரமடையத் தொடங்கியது. ராமநாதபுரம் டி.ஐ.ஜி. சந்தீப் மிட்டல் மீது குறிவைத்து கற்கள் வீசப்பட்டன. காயமடைந்த அவர், நினைவிழந்து வீழ்ந்தார். செந்தில்வேலன் உட்பட ஏராளமான போலீசார் காயமடைந்தனர்.

கலவரம் பெரிதாகிக் கொண்டே போனது. தண்ணீரை பீய்ச்சி அடிக்கும் வஜ்ரா வாகனத்தைக கொண்டு வந்தனர் போலிஸார். கூச்சலிட்டபடியே அந்த வாகனத்துக்கு தீ வைத்தனர் சிலர். அது பற்றி எரியத் தொடங்கியது. அதைப் பார்த்து உற்சாகமடைந்த சிலர், சற்றுத் தொலைவில் நிறுத்தப்பட்டிருந்த தீயணைப்பு வண்டியை எரித்தனர்.

கலவரம், அங்கிருந்து பரமக்குடி டவுனின் மற்றைய பகுதிகளுக்கும் பரவத் தொடங்கியது. பரமக்குடி ஸ்தம்பித்தது. பரமக்குடி வழியாகச் செல்லும் வாகனங்கள், கலவரம் பற்றிய சேதி கேட்டு நகருக்கு வெளியே நின்றுவிட்டன. பின்னர், பரமக்குடி ஊடாக வடக்கே மதுரைக்கும், தெற்கே ராமேஸ்வரத்துக்கும் செல்லும் வாகனங்கள், சுற்றுப் பாதையாக சிவகங்கை, திருவாடனை, ராமநாதபுரம் வழியாக திருப்பி விடப்பட்டன.

பரமக்குடியில், ஆங்காங்கே அரசு டவுன் பஸ்கள் அடித்து நொறுக்கப்பட்டன. பரமக்குடிக்கு வெளியேயும் கலவரம் தொடர்ந்தது. முதுகுளத்தூரில் கடையடைப்பு நடந்தது. பஸ் போக்குவரத்து நிறுத்தப்பட்டது. கமுதியில் இருந்து அருப்புக்கோட்டை தவிர, பிற ஊர்களுக்கு பஸ்கள் இயக்கப்படவில்லை.

ரயில்வே சிக்னல்கள் உடைக்கப்பட்டன. சிக்னல்கள் இயங்காததால், ரயில்கள் ஓடுவது நின்றது. பரமக்குடி பொன்னையாபுரத்தில் உள்ள ரயில்வே சிக்னல்களை உடைத்து நொருக்கிய ஒரு கும்பல், ரயில்வே பாதை வீதியைக் கடக்கும் ரயில்வே கேட்டையும் உடைத்தது. அதற்கு அருகிலிருந்த கேட்-கீப்பர் அறையும் அவர்களின் தாக்குதலில் இருந்து தப்பவில்லை. அடித்து நொருக்கப்பட்டது.

பரமக்குடி ஊடாக ரயில்கள் செல்ல முடியாத நிலை ஏற்படுத்தப்பட்டது. அதன் விளைவாக ராமேஸ்வரம்-சென்னை எக்ஸ்பிரஸ், ராமேஸ்வரம்-மதுரை பாசஞ்சர் ஆகிய ரயில்கள் ரத்து செய்யப்பட்டன.

கலவரத்தில் 5 பேர் கொல்லப்பட்டனர். காவல்துறையினர் உட்பட பலர் காயமடைந்து, வெவ்வேறு மருத்துவமனைகளில் தங்கியுள்ளனர். சேதமடைந்த சொத்து விபரம் இன்னமும் எடுக்கப்படவில்லை.

அரசியல் கட்சிகள் எல்லாம் சரம்சரமாக அறிக்கை விடுகின்றன. நேரம் கிடைத்த அரசியல் தலைவர்கள், நேரில் சென்று அறுதல் தெரிவிக்கின்றனர். தமிழக அரசு, அறந்தவர்களுக்கு நஷ்டஈடு வழங்கவுள்ளதாக அறிவித்துள்ளது.

கலவரத்தைத் திட்டமிட்டு தொடக்கியவர்கள் பற்றி யாரும் வாய் திறக்கவில்லை. அதன் பின்னணியில் நின்றவர்களை யாரும் கண்டித்ததாகவும் தெரியவில்லை. அநேகமான யாரையும் கைது செய்யவும் மாட்டார்கள். கேட்டால், ‘சென்சிட்டிவ்வான ஏரியா’ என்பார்கள்.

அப்படியானால், அந்த ‘ஏரியா’ தமிழ்நாட்டு எல்லைக்குள் இல்லையா? அந்த ஏரியாவில் இவர்கள் கூறும் ‘சென்சிட்டிவ்’ இல்லாத மக்களும் வசிப்பதில்லையா?

-பரமக்குடியிலிருந்து, எமது மதுரை நிருபர் அதிபன் தங்கராசுவின் குறிப்புகளுடன், ரிஷி.